ومنتاش واحد امبارح
قسمت معاه رغيف العيش
فى غدوايه وفضفضنا...
ولا أنت واحده معرفهاش
بتقعد جنبى فى الأتوبيس
وترمى فى ودنى شهوتها
كلام بايت عن الزحمة
وطابور العيش ..
شهور فى العتمه تجمعنا
وصرخه م الألم والنور
وعمر عجيب
لواد طاهر .. لواد عاهر
لواد شاعر .. لواد مجنون
بيمشى بقلب من غير نعل
وبطن الرجل ملسوعه
فى برد ديسمبر العطشان
لمطره ورعد ..
فى حر أغسطس الملفوف
بيات شتوى ...
يحير نشرة الأرصاد
تعبت أفسرك فيا
ايدين جوايا بتشدك
لحلقة ذكر وجوامع
وصوت مقرئ وترتيله
فى قلب صيوان ..
موالد أولياء الله بتنده ليك
فتتدروش ....
تلف بلاد .. تعيش صوفى
وتقرا قصايد الفارض
وتوعظنى ..
أصلى وأصوم لوجه الله
ولما شعر دقنى يطول
تروح تسكر ...
تقسم بالحشيش مقامات
وتسجنى فى كيف مسموم
من السلطة ...
ألف وراك ...
أردد لك شعاراتك ..
ألاقى فجأه كرباجك
سلخ جلدى ...
فتسترغ شرايينى كرات حمرا
وغضبانه ..
وتستحضر صور ثوار من الماضى
مهاتما غاندى أو ناصر
لناس م العالم التالت
بيحيوا فيا حبل وريد
بيوصلك ..
إيمان ريفى ......بيتكسر
رمال ناعمه..... بتسحبنى
نعام خايف مطاطى الراس
عطيل يجى ...
يغمى عنيه بمنديله ويتريق
وطعم الخدعه فى لسانه
نياق حمرا ....
.. أيا عنتر ..
حبيبتك مهرها غالى بلون دمك
ومشكلتك بإن الدم كان موروث
من العاشقه ...
يا عاشق روح ...
بيرسم حب
محبوبته
ملايكه ف لوحه سريالى
بتتعلق فى معرض فن تشكيلى
عيون الناس تعدى عليها تستغرب
ومتعديش جسور الوصل
ليك ... ليا
فتتمرد
بنات أفكارى جوايا وتتلوى
جسد حوا بيتشكل قصاد عينى
بلون بمبى ...
بلون الجنس
تغريبة ولد بينز دم أبيض
فى كف الإيد ...
تعبت أفسرك فيا
... وتر مشدود ...
بيعزفلى نغم صادق
بيرمينى بسهم جبان
ومش باقى على العشره
وتغفيلك على كتفى
وملح وعيش أكيد شاهد
فى يوم ما حاولت ترويضك
سرقت غطايا ع الآخر
فخفت أبص فى مرايا
أشوف نفسى وأنا عريان
