ردك عبارة نعى للأموات
وسؤالى كان واضح
يا نخل عاش طارح
الضله ع الجنبين
جايز حزين القلب جوا البنت
جايز غشيم الواد ف أفعاله
مقطوعه أوصاله
وبظلم كان أسود
من لون ضلام الليل
تنزيل حروفى فى سجل
المفطومين ع الحق
والمولودين بالزق ..والعافيه
وبالتنكييييد
مولود عنيد
داخل يخبط ف الحلل
لألف ميت مليون سؤال
متفطمه الاجابات لهم
لو قلتهم..هيفيدنى ايه
حلم الجنيه
وعريس على حصانه الخشب
يا قلب ياللى فرشتك
كنبه وحصير
لو صوت خرير الحزن
سرسب للودان
من فتحة الجرح القديم
تعمل غشيم
ترفض تخوض المعمعه
لو امعه ..تكسب كتييير
حلمك ضرير
ميشوفش غير لون السواد
وقفة حداد
لمحارب الحلم البعيد
جايز طريد
ياأرض معجونه بعرق
كل الولاد الطيبين
حلم السنين لسه بشوفه بيندهس
كتراب دقيق لون الوطن
كان البدن
نازز عرق
شارب مرق
دم الوريد
مقدرش أزيد
يا قلب كان
طالع هبل
نازل هبل
داخل يخبط ف الحلل
