مسروق الوجع اللى فى قلبى
من قلب البنت اللى عاشقها
واللى تملى ...
واثقه ف حبى
مدارتش ف ملامحها وكدبت
شربت ويايا عصير التوت
واتقايت لما لقتنى ف أحلامى
بنزف فى الدم ...
والحب ........... الهم
الحب حبيبتى ملوش أصحاب
ياخدوه بالباط ...
يتعاركوا عشانه فى الحاره
يدوه احساس انه هيقدر
ينقل ذرات رمل الصحرا
بمعلقة الشاى ...
أو انه يدوب كره الناس
بدل السكر ...
فى عصير المانجا ويستطعم
الحب يجوز تعبان أملس
يتشكل على حجم فريسته
يضغط .. يضغط
فتسيب الروح الجسم ضحيه
لأنياب مشطوفه ...
أو قط بيهوى يعذب فار
قبل ما ياكله
يديله إيحاء بوجود مخرج
يتعلق بالقشه الغرقان
أو يمكن صرخة رفض
بتعدى الناس
زى الكوليرا ...
بتصيب أجناس ..
نداويهم بالحجر الصحى
××××××××××
محبوبتى ...
اتعرفت عليها فى محطة مترو
لما ساعتها الباب قرر بوقاحه
إنه هيسرق كل مرتبها النونو
وأصر بطيبة قلب
إنها تسرق قلبى ..
وأصرت إنها تشرب كباية التمر بشاليموه
علشان كانت حاشيه دروسها
من يومها ...
وأنا بعشق كل محطات المترو
بلتمس العذر لكل الحراميه
ولا يمكن أشرب الحاجه الساقعه
إلا بشاليموه ...
×××××××××
الليله كريسماس ...
ومفيش ف جيوبى إلا تلاته جنيه
فضرورى أكون حاطط خطه
لهروب جبرى
من طرابيزه ف نادى التجديف
مع عشوه لطيفه
واتنين حاجه ساقعه
لشوية لب وقرطاس ترمس
عند الكورنيش ...
.... وبلاش تاكسى ...
زى ما بيقولوا المشى رياضه
والشاعر يملك إيه
غير بس قصايد شعر
ونص لسان ...
بتحبى اللون الوردى جوا الفاترين
... حاضر ...
هادهنلك أوضة النوم بجناين ورد
بتحبى عيون الأطفال الخضرا
مش صعبه علينا شويه ...
هو أنا لون عينى ولون عينك إيه ....!؟
.... وعموما ....
ممكن أولادنا يلبسوا عدسات
مامتك أكلتنى بعينها
قبل ما تاكل ودنك
بالخوف على بخت البنت
وجيران مامتك أكلوا ودانها بسؤالهم
بنتك دخلت سلك الرهبان !؟
.... معلش ....
يغفر لها إنها تملك نفس عيون محبوبتى
طاب قولى ورحمة عين مامتى
الليله هتطلب إيه من بابا نويل ...؟؟
هطلب ... أنا وأنتى وبس ...
وميدخلش ما بينا الخوف
×××××××××
شغلى .....
بخرج منه بطلوع الروح
أو برجوعها تانى للجسم
وايراد التاكسى مبيكفيش
مصاريف اخواتى الأيتام
وسيجارتى بطفيها عند النص
عشان من تانى أولعها
لزوم التوفير ...
فأكيد جبل القلب هيتمخض شعر
بطلت أروح القهوه
عشان الخوف مبقاش يسكن
شيشة أصحابى ..
الفاشل منهم زار السجن تلات مرات
والناجح متلقح جنبى
تفكيرهم زى علامة اكس (X)
عن ماتشات الكوره ...
وعن سياسات الحزب الحاكم
وعن صدر البنت اللى بتكتب قصه
وانا دايما كان تفكيرى
مين اللى يحط ايديه فى جيوبه
ويطلع تمن المشاريب
×××××××××
من تانى كريسماس ....
من تانى الكورنيش ....
برد ديسمبر ..
والرعشه اللى ف جسم حبيبتك
والتفكير فى شيطان تترى
عاملين احساس من نوع تانى
إحساس بدوى ...
بيخش ف قلب العاشق بس
فتحس بإن كيانك كله قزاز شفاف
وتخاف لحبيبتك تلمح فيك
الخوف والضعف ...
وتشوف العالم من جواك
مسخ مشوه ...
أقصد علشان تحسين الصوره
قصاد عينها
واقع هزلى ...
بيضحك عناوين الأخبار
أسرار الحرب على التقاليد
راجعه بتفتح فى ملف قديم
فى جيوش أبطال قصص العاشقين
على باب الحب وباب قلبك
أحلامنا أنا وأنتى صغار لكن
تتعدى عشانها بحور وبحور
طرطور أحمر ...
دقن طويله على صورة شيخ
واقف قدامى بابا نويل
بيدور فى الكيس السحرى
على حب يكون نفس مقاسنا
ومهوش هلاهيل .....
