صحصح وفوق
يا حصاد سنين العمر بالمنجل
من امتى بتحنجل على الأبواب
فاتح فى باب الدخول للحفلة مجانا
ومرقص الأوجاع ...
ضاع اللى ضاع من أمسى وامبارحى
بدون داعى ..
بقناعى .. بدراعى ..
هكون رابح ..
بقرار لجان الإمتحان ناجح
وبفعل كان فاضح وشوش الناس
رمية تماس الحظ جت فى الجون
كانت ظنون الخلق فيا ضعيف
معجون بطين الريف
والطيبة فى ملامحى ..
فرحى تملى بيلقى الفرح فى مداسك
يا طاهرة يا صدقة أبوس راسك
فاسكب تحفر فى الوريد مجرى
ينقل فى دمى المختلط
بدماء جروح البنت ...
انسان آمنت بقدرتك
على كسر ننى العين
عايش لكين ...
مقتوله فيا الروح
بين الجروح ببعت دعايا
يرتجع مذلول ..
عايز أقول ..
تلت التلاته بكام
القى اجابتى متساويش القرش
بيقولوا سيف المعز
مش أقوى من ماله
والسوق بيحلاله
بيعى بسرعه بأى سعر رخيص
تراخيص خروجى من وريدك يا قصيدة همس
فرجه فقط ممنوع سفر أو لمس
الست زينب ومعجزاتك والسبح وإلخ
شبعت بكا منى
لازم مهو اكمنى
محروق على السفود
بس الحقيقة أنى بكره هعود
ماسك رمادى بعد ما اتحرقت بإيد
وبإيدى التانيه ماسك عصا موسى
والخطة مدروسه
هعود تانى أنا ابنك
اللى ميموتشى فى يوم محروق
