بستسمحك يا رب

بستسمحك يا رب ..

بيبان الحلم على قلبى

دا القلب متفتت حتت

والمغفرة مره ...

إكرمنى بالمره

واهدينى سر الإنتقام والصفح

كل الأمانى بتتولد أبكار

وبتنتهى بالعار ..

والعار قرين الدبح

بستسمحك يا رب

اقفل بيبان الحلم على قلبى

الفلسفه شابت فى قلبى

وابن رشد بيتولد

والحكمة عندى معجزتش

لجلن متخلص كل حكاياتى القديمه

بطعم حزن شفيف ..

حتى اختزال الزمن للعمر

.... مرثيه ....

كل اللى فاضل منها بواقى

فصل خريف

بستسمحك يا رب

أقفل بيبان الحلم على قلبى

أبنيلى بيت بيطل ع الملكوت

أحيا وأموت على صوت ملايكه

بيعبدوك على حق ..

الخلق غطت نفسها بالكفر

واستوطنت فى الزيف

الأرض زانيه على الملأ

وبيندهولها بألف إسم عفيف

بستسمحك يا رب

أقفل بيبان الحلم على قلبى

دا القلب متفتت حتت

والمغفره مره