أحاسيس من الصلصال

(1)

وينزف قلبى جوايا

نزيف القلب مش دمه ولا دموعه

ولا ترديد صراخ جوعه للمسة إيد

نزيف القلب يوم تعرف

بإن الحب مش أحاسيس من الصلصال

بتتشكل على راحتك

                    على كيفك ...

وكفة إيدك العاشقه ..

خطوطها تطبع التضاريس لكف القلب

ويقرا القلب طالعها

جراح .. أفراح .. وسكه للسفر والحب والمواويل

وعمر طويل ..

وبنت قريبه من دمك .. وبتحبك

وواحده غريبه رايدها

تشوفها فى المنام صدفه ..

وتديلك رقم تليفونها والعنوان

وخصلة شعر للذكرى ..

عشان بكره ما يقدر يبعد القلبين

وترسم بكره فى عنيها

نهار للحب كله خيال

وتصحى فجأه من نومك ..

وينزف قلبك الحانى ..

عشان العلم شئت انى ..

مهوش أحاسيس من الصلصال

(2)

وينزف قلبى جوايا

نزيف القلب مش دمه ولا دموعه

ولا ترديد صراخ جوعه

نزيف القلب يوم ما بترسم الأحلام بتباشيره

فى سبورة هوى عمرك ...

وتيجى بشاورة العالم وتمحيها

وترسم تانى ملامحها ..

فى ننى العين وفى الضحكة ولون الشعر

بياض الحلم هيلون سواد الشعر

والسبورة ويا الليل ...

ورحلة عمرك الباقى ودمع العين

وتيجى بشاورة العالم وتمحيهم

فى غمضة عين ..

(3)

وينزف قلبى جوايا

نزيف القلب مش دمه ولا دموعه

نزيف القلب فى خضوعه لحبسة نفسه

جوا ضلوع بتتاكل فى يوم ورا يوم

.. ضلوع هشه ..

هتتفتت بطبطبة الحبيبة بإيدها فوق الصدر

بأول ريح تحاول تفتح الشباك

بقدسية صراخك جوا بحر الشعر

ورغم بإنها هشه

هتتكسر .. وتتفتت .. وتتبعتر ..

فى فصل خريف

هيعشق قلبك المسجون لسجانه

ويحبس نفسه جوا الخوف