طقوس

(1)

قلبك مش بياع روبابيكيا

قلبك مش مدمن للكيف

علشان يتذل

ولأنك خارج دلوقتى

من وسط خيام عربان رحل

حسيتك بكرامة البدوى

اللى بيدخل على قصر ملوك الروم والفرس

بقصايد م الشعر النبطى

مكنتش فى يوم ...

من فوق عربية روبابيكيا شاريها

(2)

فى رياضة استعراض العضلات

الأوقح هو اللى هيكسب ..

مش لازم يملك نفس ايدين شمشون

لكن لازم ..

ان يكون تقسيم الوش

يشبه دايما وش بروتس

ولأنك ظاهر وشك هو الباطن

باطن قلبك هو الظاهر ...

فلايمكن تكسب غير

آخر مركز ...

(3)

التعريشه ..

.. اللى عليها القلب مضلل

دبلت غرقانه من المطره

ولأنك مش قارئ جيد

... ماغوط ...

مش عارف ليه ..

محتاجلك أكتر دلوقتى ..