أنا لسه خارج م الصلا ..
رعشه بتسكن قلبى وحروفى
عينى بتتمنى الوصول للمنتهى
أو تلمس الكعبه ...
روحى سايبها معلقه بين السما
والأرض مش نازله ...
فمتتعبوش روحكم ولا روحى
روحى عادتش بعد نص الليل
تتعب من الوحده ...
أو تنزل الشارع عشان تصطاد
كل الجراد اللى كان واكل غيطان
القلب جوايا
هزمته بسورة التوبه
وجيت زارع فى قلبى سورة الفاتحه
عشان تطرح شجر لبلاب
يبص لفوق ...
لحد السدره ومعدى على الجنات
يعوز يدخل ...
وممنوع الدخول ... ما خلاص
*********
سكوت ... آسف
أنا صليت ...
وقبل ما أصلى كنت قريت
حاجات كات واخده ضربة شمس
حاجات بتمس فى وريدى فيتكهرب
بكيت على بابك المفتوح
وعينى من الدموع دابت
واتمنيت ..
اشوفك فى المنام مره
واقاسمك غربتى المره
وأحكيلك عن الأوجاع
وع اللى اتباع قصاد عينى
وع اللى شروه بثمن بخس
وع اللى النور عمى عيونهم
لكن شافوا كما الخفافيش
وجم سنوا ...
سيوف تترية النهايات بتتلوى
على أوراق بريئة الذنب لو تنطق
تقول يا هوووه
منيش كافره ..
سطورى معلنه الإضراب
عشان شايفه
إيمان نبوى بيتكسر
حروب رده بتتكرر
وطن ملكوم بيتأزم
ويتمخض فران خايفه
بوشوش جرانيت ...
********
سكوت ... فاصل
بلاش أوطان
لأن الجرح مش محدود
ومش موجود على الخارطه
ف مكان واحد ...
يجوز تلاقيه ...
فى بنت فى جامعة السوربون بتتمنى
حجاب يسترها فى الغربه ...
فى طفل شيشانى مات مقتول
كلاب مسعوره تنهش لحمه
مش لاقى تراب يتاويه ...
فى شيخ من غزه نفسه يصلى
يوم العيد فى قلب القدس ...
مناضل فوق تراب لبنان
بيستشهد على الفطره ...
يجوز تلاقيه ...
فى واحد نفسه يطهر وينسى شيطان
بيرطن بربرى لابسه
وينسى برفانات واحده
بتتمايع وتتلوى ..
وينسى تشكيلات حوا
وينسى كاس من الخمره
ورق بفره ...
بالات ممنوع ...
*********
سكوت ... جايز
يقولو إن أنا رجعى
ومتخلف عن الحريه والعاقلين
سكوت .... آسفس
