مفتتح
وأتوه ما بين رقة تفاصيلك
وتكسير الرخــام
فتطببينى بالوجع
تلبسنى فوبيا الصمت
أهزى بسكر وعربدة شاعر
عشقى يا كرباج الشوارع والقلوب
ادخل فى جلد الذات ومتملش
(هذى جراحك تلتئم ....
عند انهزامك فى القصيد )
القصيدة
منديل ورق ...
علشان عنين الأرض بتحب البكا
نضاره سودا تدارى مطر الليـــل
أحسن يسيل ع الخد
دمعك ولو ينفد ...
بتحسى إنه بيبتدى نزعك
فتقاومى ضحكه بتتولد بالكى
اتهجى ليكى حروف بتتوجع
وابدأ ألملم فرحى فى جيوبى
البس جنونى ف رقصه بدويه
وأبدأ لوحدى انتهاج النزع
مهو إنتى آخر سيره م الورع والحزن
دمعك بتول ....
ضحكى نجاسه ف مفردات حزنك
فأكيد تقاومى بسمتى بالدمع
أول خيوط العشق أفعال التضاد
الحجب ... شف
الشــد ... جذب
الصد ... وصل بصوره عكسيه
لو تعرفينى ...
لو تعرفينى زى حبات المطر والرمل
تتشكلى ف دمى بطعم المطره
أسكر وانتشى
دراويشى تلبسنى
وعشقك مفردات الذكر
تتشكلى ف دمى بطعم الرمل
أرطن بربرى
أسكن خيام البدو والعربان
وأكونلك قيس
لو تعرفينى بجد
... لو ...
...........
أنا عارفه
لكن بشتهى الموت البطئ
بزرع فى دمى
الملح
واليود النقى
والسم ...
فمتشتهيش عشقى بقصايد شعر موزونه
مهى رعشة الجرح القديم فى القلب
مش زى كرمشة القصيده
ف بنطلون مبلول ...
إقلع جنونك أصلى مش ليلاك
إقلع حدود الدروشه فى العشق يا شاعر
خطوة ولى شاعر مبتقدمش
... بتأخر ...
..............
عينك صليب عطشان
وأنا قلبى زى مسيح مبيموتش
وكل من ف العشق من بعدى
هينسى الفكره بالتعميد
أنا حى فيكى وبأثر رجعى
.... متقاومنيش ....
وسيبينى بجنونى العريق
بدوى ولسه متلبسش بمعطيات
عصر الحـداثه ...
وزحمة الدخان ...
وكيف العولمه ...
... متقاومينيش ...
أنا شفت ضلى بيحتضن ضلك
لحظة كسوف الشمس
مع إن أكتر حضن جمعنا
سلام بالإيد ..
... كيوبيد ...
مهواش رمز مجهول الهويه والوطن
كيوبيد بيسكن قاره مجهوله
جوا الخرابه اللى اسمها قلبى
لحظة خروج السهم كان لازم
يبص بزاويه رأسيه
أو حتى يحسب إتجاه الريح
... ولا بتفرق ...
السهم مدفوع بالقدر جبرى
ضهرى ف ضهر الحزن اثبات للتضاد
لكن بيتقابلوا ....
تفسير لكروية مدار الأرض
ضهرى ف ضهرك ...
.........................
...... فلسفه فاضيه .......
..............................
..............................
ولا احنا لازم نقطع المسافات ونتقابل
على باب خريف العمر
بالصدفــــــه ......!!!
